گُنبد روشنی بھی برق پا اور وقت بھی گرمِ سفر   اور خوشبو کا پرندہ بھی پھَڑپھَڑاتا ہے فضا میں اپنے پَر ،موسموں کے قافلے بھی اپنے پرچم اپنے شانوں پر اُٹھا ئے چھوڑ جاتے ہیں غبارِ رہگزر   اور سمندر کھُردرا،نیلا سمندر جس کے گہرے،تلخ،برہم پانیوں میں بھی رواں ہے سانس لیتی اور بقا کی جنگ لڑتی ایک دنیا ئے دِگر   ،زندگی۔۔۔۔ برسات کا ٹھہرا ہوا پانی۔۔۔؟ !نہیں۔۔۔۔ ،اس کا منصب۔۔۔۔ خوابِ ارزانی۔۔۔۔؟ !نہیں۔۔۔۔   زندگی ہے کارگاہِ جسم و جاں شہکارِ خلّاقِ جہاں آتی جاتی سانس وہ آری ہے جس سے لمحہ لمحہ کٹ رہا ہے، عُمر کا کوہِ گراں   ،زندگی کی نغمگی میں اک صدا ئے تیشہءِ خوں رنگ ہے ایک پیہم ضرب کا آہنگ ہے   زندگی ہے وہ طلسمی گنبدِ آفاق گیر جس کی جوہر کار قوّت کے اسیر آسمانوں کے عجائب، کہکشانوں کے ضمیر   جس کا پُراسرار، پیچیدہ جمال کل بھی تھا اک حرفِ حیرت آج بھی ہے اک سوال